香港麻雀玩法規則：廣東牌由開枱到食糊

香港麻雀（廣東牌）點打？本頁由一副牌有咩、執位做莊、擲骰開門、派牌補花、摸打次序、上碰槓、叫糊食糊、三番起糊、到流局連莊，一次過講清楚整個流程，俾第一次上枱或者好耐冇打嘅人睇完就打得。牌型值幾多番同幾多錢，另有番數表同番數換算表。

免費，毋須註冊。你哋嗰枱打台牌？見港式台牌玩法規則。

一副麻雀有咩牌

一副香港麻雀 144 張，分三類：

• 數牌 108 張：筒子、索子、萬子三門，每門一至九，每款四張。
• 番子 28 張：東南西北四款風牌，中發白三款三元牌，每款四張。
• 花牌 8 張：春夏秋冬同梅蘭菊竹各一張。摸到花唔可以留喺手，要擺出嚟再補一張。

食糊形係四組面子加一對眼：面子可以係順子（同門三張連續，例如四五六筒）、刻子（三張一樣）或者槓子（四張一樣，要開咗槓先算）；眼係一對一樣嘅牌。特殊牌型十三么例外，唔使砌四組。

開枱前講定枱規

廣東牌枱規唔算多，但每一樣都影響銀碼，開枱前講清楚：

每個組合對應幾多錢，番數換算表有計錢機同完整表。

執位、做莊、圈風門風

1. 執位：東南西北四隻風牌反轉洗勻，擲骰決定邊個先抽。抽到東嘅坐東位，其餘按南、西、北逆時針坐。
2. 莊家：第一局由東位做莊（有啲枱東位再擲一次骰，數到邊家邊家做莊）。莊家係東家，跟住逆時針係南家、西家、北家，呢個就係每家嘅「門風」。
3. 圈風：四家各做過一次莊係一圈，第一圈東風圈，跟住南風圈、西風圈、北風圈。四圈打完就係一局，俗稱「一個東」或者「打一局」。
4. 連莊：莊家食糊就繼續做莊（連莊），閒家食糊就輪到南家做莊。流局連唔連莊睇枱規，屋企枱多數連。

圈風同門風影響番數：碰到同圈風或者自己門風一樣嘅風刻，各計一番；花牌號碼同自己門風一樣（東一、南二、西三、北四）係正花，每張一番。

擲骰開門、派牌、補花

1. 擲骰：四家將牌砌成四道牌牆，莊家擲三粒骰。由莊家自己數「一」，逆時針數骰點，數到邊家就由嗰家面前嘅牌牆開門。
2. 開門：喺開門嗰家嘅牌牆，由右邊數起撥開骰點數目嘅牌墩。撥開嗰截嘅末端叫「槓尾」，補花、補槓喺呢度摸；之後嗰截叫「牆頭」，正常摸牌由呢度順時針摸。
3. 派牌：莊家先由牆頭攞兩墩（四張），南、西、北家跟住各攞兩墩，重複三次每家十二張。跟住莊家「跳牌」攞第一同第五張，閒家各攞一張：莊家十四張，閒家十三張。
4. 補花：由莊家開始，有花就擺出嚟由槓尾補一張，補完到南家、西家、北家。補返嚟又係花，等其他家補完再由莊家補第二輪。
5. 補完花，莊家打出第一張牌，牌局開始。

摸打次序同牌河

莊家打出第一張之後，各家逆時針輪流：由牆頭摸一張，如果係花就擺出嚟由槓尾補一張，然後打出一張牌落牌河。打出嘅牌擺喺自己面前，由左至右排好，方便人睇。

• 上家未打牌，唔好伸手摸牌；睇清楚上家打乜先摸。摸咗牌撈入手，人哋就唔可以再要上家嗰張牌。
• 一張牌只可以喺打出嗰一刻俾人上、碰、槓、食；下家摸咗牌之後就過期。
• 由自己摸打一次，到下一次摸打之前，叫「一巡」。
• 打出嘅牌唔使讀出嚟，讀錯累人哋錯鳴牌，責任在自己。

上、碰、槓

上

上家打出嘅牌，同自己手上兩張砌到順子（例如手上四筒六筒，上家打五筒），叫「上」攞嚟砌成明順，擺喺門前，然後打一張。只可以上上家打嘅牌，對家同下家打嘅唔可以上。

碰

任何一家打出嘅牌，同自己手上一對相同，叫「碰」攞嚟砌成明刻，擺喺門前，打一張，然後由自己嘅下家繼續摸牌（中間嗰家跳過）。

槓

• 暗槓：手上四張一樣，自己摸牌之後可以開暗槓，四張擺喺門前（比賽規則要打開俾人睇），由槓尾補一張再打。暗槓算唔算破門前清各枱唔同：唔少屋企枱唔當破，香港麻雀協會規則就當破。
• 加槓：已經碰咗嘅明刻，手上再摸到第四張，可以加上去補一張。打咗落牌河就攞唔返嚟加槓。
• 大明槓：人哋打出嘅牌同自己手上暗刻一樣，叫「槓」攞嚟開明槓，補一張。人哋打出同你明刻一樣嘅牌就唔可以槓。

上咗或者碰咗嗰下唔可以即刻開槓，要等自己摸牌先得。槓完補牌即刻自摸，叫「槓上自摸」，加一番。

幾家同時想要同一張牌

優先次序係食糊 ＞ 碰或者槓 ＞ 上。上家話上，下家話碰，碰贏；有人話食，食贏晒。兩家同時食同一張牌，各枱處理唔同：有啲枱一炮多響全部食得，有啲枱截糊，即係由出銃者嘅下家開始數，最近嗰家先食得，開枱前講定。

叫糊、食糊：出銃、自摸、搶槓

• 叫糊：手牌爭一張就完成食糊形，叫「叫糊」或者「聽牌」。廣東牌唔使宣告。
• 出銃：人哋打出你叫緊嘅牌，叫「食」攞嚟食糊。打出嗰隻牌嘅人就係出銃者，全銃制由佢一個人付晒成鋪。
• 自摸：自己摸到食糊嗰張，加一番，三家各付一半，即係贏家合共收一倍半。
• 搶槓：人哋加槓嗰張啱啱係你叫嘅牌，可以搶嚟食，加一番，當開槓嗰家出銃。暗槓唔可以搶；香港麻雀協會規則容許十三么搶暗槓，屋企枱未必。
• 海底撈月：摸牌牆最後一張自摸，加一番。
• 過水：同一巡內有人打出你叫嘅牌而你唔食，嗰巡就唔可以食同一隻牌（俗稱蘇州過後無艇搭）。
• 食糊動作：食糊嗰張放開一邊，成手牌攤開俾三家睇，排好四組一對先計番。三家確認前唔好洗牌。

三番起糊、計番、封頂

食糊之後計番：牌型番（平糊一番、對對糊三番、混一色三番、清一色七番……）加附加番（自摸、門前清、正花、圈風刻、中發白刻各一番）加埋就係總番數。

• 起糊：香港最常見三番起糊，副牌唔夠三番唔可以食，就算叫緊糊都要繼續打。冇任何番嘅牌叫「雞糊」。
• 封頂：番數去到上限就唔再升，叫「爆棚」或者「滿糊」，常見八番、十番或者十三番。十三么、大四喜呢啲例牌食出即係爆棚。
• 邊啲唔可以同時計：清一色已經包含混一色，只計清一色；大三元嘅八番、小三元嘅五番已經計埋中發白刻本身嘅番，唔會再加。

每隻牌型值幾多番，附計番例子，見香港麻雀番數表。

番數點變做錢

廣東牌唔係一番一個價，而係由三番起翻倍上去：二五雞三番 $8、四番 $16，之後半辣上五番 $24、六番 $32、七番 $48、八番 $64；辣辣上就五番 $32、六番 $64、七番 $128。出銃全銃由出銃者付晒；自摸三家各付一半。

二五雞、五一、一二蚊每個番數值幾多錢，同埋 8番64、10番128 呢啲叫法係咩意思，見香港麻雀番數換算表，有計錢機即揀即計。

流局、連莊、一局幾耐

• 流局（黃莊）：牌牆摸到最後一張都冇人食糊，嗰局冇輸贏，重新洗牌。屋企枱多數流局莊家連莊；香港麻雀協會嘅比賽規則流局唔連莊。
• 連莊：莊家食糊繼續做莊。廣東牌連莊冇額外番（同台牌唔同），只係多做一局莊。
• 一局幾長：四圈起碼十六局，連莊會再多；有啲枱講定打幾多圈或者打到幾多點就停。

詐糊、相公、包牌

• 詐糊：攤牌話食糊但其實食唔到（唔夠番、牌型唔啱、過咗水）。屋企枱常見係賠三家每家一鋪爆棚；香港麻雀協會規則係扣一鋪例牌嘅分數。嗰局重新開始，莊家重新做莊。
• 相公：手牌多咗一張叫大相公，少咗一張叫小相公，嗰局都唔可以食糊。摸到花或者開槓唔記得補牌，一巡內補返就冇事。
• 包牌：打出關鍵牌俾人砌成大牌，要「包」對方自摸嗰份。香港麻雀協會規則有大三元包（供出第三副三元刻嗰家包）同十二章包（供出第四組明章嗰家包），屋企枱亦常見包大四喜、字一色、清一色。包牌只包自摸，出銃照由出銃者付。

常見問題

牌型幾多番見香港麻雀番數表；幾多番幾多錢見番數換算表；唔識嘅字眼查麻雀術語表。你哋嗰枱打台牌？港式台牌玩法規則另有專頁。