香港麻雀術語表：廣東牌、港式台牌常用字眼

打香港麻雀成日聽到嘅字眼，廣東牌同港式台牌都有：由上碰槓、出銃自摸、叫糊過水，到辣上、二五雞、拉數、踢半，每個詞一兩句解釋，附相關規則同番數頁連結。用搜尋或者分類即刻搵到。

基本動作

執位

開枱前抽風牌決定四家坐邊、邊個先做莊。

做莊、莊家、閒家

東家係莊家，其餘三家係閒家。廣東牌莊家冇額外番；台牌莊家食糊、出銃都多計一番。

連莊

莊家食糊之後繼續做莊。台牌連 N 莊再加 2N 番，廣東牌只係多做一局莊。

圈風、門風自風

圈風係而家打緊邊一圈（東南西北），門風係自己坐邊個風位。碰到同圈風或者門風一樣嘅風刻各計一番。

開門、槓尾、牆頭

莊家擲骰決定由邊家嘅牌牆開始攞牌。撥開嗰截嘅末端叫槓尾，補花補槓喺度摸；之後叫牆頭，正常摸牌由呢度摸。

派牌、跳牌

派牌時莊家最後攞第一同第五張，所以莊家十四張、閒家十三張。台牌唔跳牌，每家十六張。

補花

摸到花牌要擺出嚟，由槓尾補一張。派牌後由莊家開始逐家補。

上

上家打出嘅牌同自己兩張砌到順子，攞嚟砌明順。只可以上上家嘅牌。

碰

任何一家打出嘅牌同自己一對一樣，攞嚟砌明刻。碰咗之後由自己嘅下家繼續摸。

槓明槓、暗槓、加槓

四張一樣砌成槓子，要由槓尾補一張。手上四張自己開係暗槓；碰咗再摸到第四張加上去係加槓；人哋打出同自己暗刻一樣嘅牌攞嚟開係大明槓。

鳴牌

上、碰、槓、食嘅統稱，要出聲先算數。同一張牌幾家想要，食糊優先，跟住碰槓，最後上。

門前清門清

成手牌冇上、碰、明槓過。廣東牌一番；台牌門清五番，門清自摸另計。暗槓算唔算破門前清各枱唔同：唔少屋企枱唔當破，香港麻雀協會規則就當破。

牌河

枱中間打出嘅牌擺嘅位置，每家排喺自己面前。

一巡

由自己摸打一次到下一次摸打之前。過水、碰唔碰都以一巡計。

牌牆牌山

洗完牌砌成嘅四道牆，每墩兩張。

食糊相關

食糊糊、胡

手牌砌齊四組一對（台牌五組一對）而且夠番，宣告贏嗰鋪。

叫糊聽牌、上聽

手牌爭一張就食糊。廣東牌唔使宣告；台牌可以宣告「叮」。

出銃放銃、放炮

打出嘅牌俾人食糊。全銃制由出銃者付晒成鋪。

自摸

自己摸到食糊嗰張。廣東牌三家各付一半，加一番；台牌三家各付全數。

全銃、半銃

全銃即係出銃者付晒；半銃出銃者付一半，其餘兩家各付四分一。

搶槓

人哋加槓嗰張啱啱係自己叫嘅牌，搶嚟食糊，當開槓嗰家出銃。暗槓唔可以搶。

槓上自摸槓上開花

開槓補牌即刻自摸，加一番。連續兩槓再自摸係槓上槓自摸，廣東牌計八番。

海底撈月

摸牌牆最後一張自摸，加一番。台牌另有河底撈魚，食最後一張打出嘅牌。

一炮多響一炮雙響、三響

一張牌同時俾兩家或者三家食糊。有啲枱全部食得，有啲枱截糊。

截糊

兩家同時食同一張牌時，由出銃者嘅下家數起最近嗰家先食得，另一家食唔到。

過水蘇州過後無艇搭

有人打出自己叫嘅牌而唔食，同一巡內就唔可以再食嗰隻牌。台牌叮咗之後過水，成局唔食得。

包牌包自摸

打出關鍵牌俾人砌成大三元、大四喜等大牌，要一個人包對方自摸嗰份。出銃照由出銃者付。

天糊、地糊

天糊係莊家派完牌即食糊；地糊係閒家食莊家打出嘅第一張牌。廣東牌計滿糊；台牌天胡一百六十番。

流局黃莊、荒牌

牌牆摸完都冇人食糊，嗰局冇輸贏。屋企枱多數莊家連莊。

雞糊

冇任何番嘅食糊。三番起糊嘅枱雞糊唔食得，計錢表入面雞糊嗰行只係參考。

起糊

食糊嘅最低番數，香港最常見三番起糊。

牌同牌型

筒、索、萬

三門數牌，每門一至九各四張。清一色即係成手牌同一門。

番子字牌

東南西北中發白。混一色係一門數牌加番子；字一色係全部番子。

花牌、正花、爛花

春夏秋冬梅蘭菊竹。號碼同自己門風一樣係正花（東一南二西三北四），廣東牌每張一番；唔啱嘅係爛花，廣東牌唔計番，台牌就有番。

一台花

集齊春夏秋冬或者梅蘭菊竹一套。廣東牌兩番；台牌即時向三家收。

眼將、對子

食糊形入面嗰一對一樣嘅牌。

順子、刻子、槓子面子

順子係同門三張連續，刻子係三張一樣（碰出嚟叫明刻，自己摸齊叫暗刻），槓子係四張一樣開咗槓。統稱面子。

么九

一同九嘅數牌。花么九係只有一九同番子，清么九係只有一九。

平糊

四組順子加一對眼，冇刻子。廣東牌一番；台牌平胡五番而且定義較嚴。

對對糊碰碰糊

四組刻子加一對眼。廣東牌三番；台牌四十番，門清自摸嘅對對糊叫機機糊。

十三么

一九筒索萬加東南西北中發白各一張，其中一張多一張做眼。廣東牌滿糊。

爆棚滿糊、封頂

番數去到枱規上限，常見八番、十番或者十三番。例牌（十三么、大四喜等）食出即計爆棚。

般高一般高

兩組一模一樣嘅順子（例如兩組四五六筒）。台牌計番，三組一樣係一色三同順。

相逢

唔同門但數字一樣嘅順子（例如四五六筒同四五六索）。台牌計番，三門齊係三相逢。

四同順、五同順

四組或者五組數字一樣嘅順子，唔理花色。台牌牌型，各枱番數唔同，見港式台牌番數表。

計番計錢

番

牌型大細嘅單位。廣東牌由三番起翻倍計錢；台牌番數直接乘番值再加底。

底數底

廣東牌指三番值幾多錢嘅起點（二五雞 $8）；台牌指每鋪固定嘅基本銀碼（例如 $5 底）。

二五雞、五一、一二蚊

廣東牌三種常見底數，名稱來自舊時雞糊同一番嘅價錢。以今日常見計法，三番分別係 $8、$16、$32。

辣上辣

四番以後銀碼點樣升。半辣上每兩番翻一倍，中間嗰番升一半；辣辣上每番翻一倍。

8番64、10番128

枱規簡稱：前面係封頂番數，後面係封頂嗰級嘅銀碼。兩個都係二五雞半辣上，一個八番封頂一個十番封頂。

自摸加半

廣東牌自摸三家各付一半，贏家合共收一倍半。

番值一番幾錢

台牌每一番值幾多錢，慣例係底嘅五分一（$5 底 $1 番）。

埋單

打完成場結算每人輸贏。台牌埋單先結清所有拉數。

台牌專用

港式台牌台灣牌、十六張

香港人打嘅十六張台灣麻雀，用香港自己一套番數表同拉數制度。

叮叫叮

宣告自己叫糊，之後唔可以換牌、鳴牌，食糊加五番。叮咗一巡內食糊叫即食，再加五番。

天叮、地叮天聽、地聽

派牌補花後未摸牌已經叮係天叮，第一巡叮係地叮，番數各枱由三十到六十番不等。

拉數拉

贏咗唔即時找數，記住落下鋪。再贏同一個人條數乘 1.5。詳見拉數埋單教學。留意「拉莊」一詞有兩個意思：有人用嚟講拉數，但香港麻雀協會同台灣麻將入面「拉莊」係指莊家連莊嘅額外番。

拉一口、拉兩口

同一個方向連續贏未找嘅次數。

踢半減半

被拉嗰家反食拉住自己嗰家，只付之前條數一半。

斬拉

被拉夠三口，即時全數結清唔再拉。

莊番

台牌莊家嘅額外番：做莊一番，連 N 莊再加 2N 番。

即時賞罰

唔入番數、唔跟拉數，一發生就找嘅數：一台花、七搶一、八仙過海、暗槓收底、圍骰、一二三等。

七搶一、八仙過海

一人七隻花另一人摸到第八隻係七搶一；一人集齊八隻花係八仙過海。兩樣都即時收。

嚦咕嚦咕、十六不搭

台牌兩個唔使砌五組一對嘅特殊牌型：嚦咕嚦咕係五對加兩刻（八對係另一個變化，番數另計）；十六不搭係十六張冇一組搭子，三門數牌各三隻隔三（例如一四七）加齊東南西北中發白。

罰則禮儀

詐糊

攤牌話食糊但其實食唔到。要賠三家，嗰局重新開始。

相公大相公、小相公

手牌多咗一張係大相公，少咗一張係小相公，嗰局唔可以食糊。

食換偷張

碰咗之後打出同明刻一樣嘅牌，或者上咗之後打出本來可以砌返同一組嘅牌。比賽規則禁止。

叫碰唔碰嗌完唔要

出咗聲話碰或者上但唔要。有啲枱罰一個底。

斷橋

攤牌時手牌散咗、混咗入其他牌。輕微冇事，嚴重可以當詐糊。

做錯莊

唔輪到自己做莊而做咗。摸頭牌前發現可以改正，之後就將錯就錯打完嗰局。

常見問題

由開枱到食糊嘅完整流程見香港麻雀玩法規則同港式台牌玩法規則；牌型幾多番見香港麻雀番數表同港式台牌番數表；幾多番幾多錢見番數換算表。